Marco lexislativo sobre os dereitos das persoas con discapacidade e a súa inclusión social

A pasada semana demos comezo ao curso " Marco lexislativo específico e xeral sobre os dereitos das persoas con discapacidade e a súa inclusión social". Esta formación, inserida no Plan de Formación da Escola Galega de Administración Pública 2024, está deseñada integramente por RETNOVA para proporcionar unha comprensión profunda das normativas e políticas, que protexen os dereitos das persoas con discapacidade e promoven a súa inclusión social activa.

A programación aborda unha aproximación á normativa vixente que, de forma específica, trata a discapacidade e tamén outra normativa de carácter sectorial que inclúe aspectos que afectan aos dereitos das persoas con discapacidade nos distintos ámbitos como o deporte, o emprego, a educación, saúde etc.

Ao longo do curso, o alumnado analizará as leis e directrices tanto no ámbito autonómico como nacional e internacional, que aseguran a igualdade de oportunidades e o respecto polos dereitos fundamentais das persoas con discapacidade.

Esta acción formativa é unha excelente oportunidade para adquirir competencias e ferramentas que permitan unha mellor intervención e apoio ás persoas con discapacidade, así como para contribuír ao avance cara a unha sociedade máis xusta e inclusiva.

Moitas grazas á EGAP por confiar unha vez máis no labor de RETNOVA.