Unha sociedade sen violencia, un dereito para todas as mulleres

Hoxe, 25 de novembro, conmemoramos o Día Internacional para a Eliminación da Violencia contra as Mulleres, unha data para reflexionar sobre os desafíos que aínda quedan por acadar e sobre as vidas que se ven afectadas pola violencia de xénero en todas as súas formas.

Este día é unha chamada de atención para seguir traballando por unha sociedade na que ningunha muller viva con medo, onde todas gocen dos seus dereitos e da súa liberdade, sen ser sometidas a calquera tipo de violencia ou discriminación.

O tema escollido pola ONU para este 2024 é "Cada 10 minutos unha muller é asasinada. #NoHayExcusa. ÚNETE para poñer fin á violencia contra as mulleres"; o obxectivo é mobilizar a toda a sociedade ante unha alarmante escalada da violencia contra as mulleres, así como revitalizar os compromisos e esixir responsabilidade e medidas concretas.

A violencia de xénero afecta á vida, á saúde e ao benestar das mulleres e das persoas ao seu cargo, pero tamén á sociedade en xeral. É responsabilidade de todas e de todos crear espazos seguros e de respecto, onde a igualdade e o apoio sexan unha realidade.

En Retnova somos conscientes de que é fundamental seguir insistindo na sensibilización, na concienciación e formación, na prevención e no apoio ás vítimas, e nestas premisas baséase o noso traballo. Onte, hoxe e sempre, defendemos e apostamos por un mundo libre de violencias machistas, onde todas as mulleres, sen excepción, poidan vivir con dignidade, igualdade e liberdade.

Cada acción conta, cada voz suma, e cada compromiso é unha pequena vitoria.